P10M shabu nasakmit sa operasyon sa kapolisan

CEBU, Philippines — Nadakpan sa Station Drug Enforcement Unit sa Police Station 3 sa Cebu City Police Office(CCPO) ang usa ka 45-anyos nga babaye nga high profile drug suspect atol sa buy-bust operation sa Sitio Front Blessed, Barangay Tejero, siyudad sa Sugbo kagahapon sa kaadlawon.

Ang nadakpan mao si alyas Daling, residente sa A. Lopez Street, Barangay Calamba ning siyudad.  Nakuhaan kini og 1,030 grams sa gituohang shabu nga nagkantidad og kapin P7 million.

Matud ni Police Major John Yango, Hepe sa Police Station 3 nga si alyas Daling nadakpan na niadtong tuig 2019 pinasikad sa warrant of arrest gumikan sa kaso niini niadtong 2006 tungod gihapon sa ilegal nga drugas.

Nakagawas ang dinakpan niadtong Huly 2022 human na-grant ang motion to quash bail.  Apan dihang nakagawas na kini sa prisuhan giingong nibalik kini sa maong ilegal nga negosyo.

Sa impormasyon nga ilang nakuha makabaligya kini og tulo ka kilong shabu kada duha ka semana ug ang operasyon niini gipaagi og meet up sa usa ka lugar.  Gawas niini, maghagbong sad kini og illegal nga drugas sa iyahang contacts kung asa dapita dinhi sa Cebu City.

Gikatahong gikan sa usa ka piniriso sa usa ka jail facility sa Leyte ang transaksyon sa suspek.

“Ma consider nato ni as high value individual kay since dinagko pud ning iyahang duwa gani ang atoang nasakmit nga edebinsiya mga estimated 1 kilo and 30 grams base lang sa atong na confiscate nga katong by pack na siya nga 25 grams per pack, tapos naa pay katong gagmay so nikabat gyud siya og one kilo kapin,” sigon ni Yango.

Si Police Regional Office-7 Director Brigadier General Anthony Aberin midayeg sa Police Station 3.           

Samtang nasakmit sab gikan sa duha ka mga ilegalista ang binultong shabu sa buy-busy operation sa mga sakop sa PDEU Cebu Police Provincial Office(CPPO) sa Barangay Tomonoy, Lungsod sa Moalboal sa miaging adlaw.

Ang suspetsado mao sila si alyas Cristoper, 32 anyos, nagpuyo sa Barangay Tangke 1, Naga City ug alyas Febie, 38 anyos, residente sa Barangay Mambulak, Silay City Negros Occidental.

Nakuha gikan sa mga suspetsado ang 450 gramos sa gituohang shabu nga nagkantidad kapin P3 million.

Kasong kalapasan sa Section 5 ug 11, Article II sa Republic Act 9165 ang ipasaka batok sa mga suspetsado. (BANAT NEWS)