Duha ka motor napunggit sa SUV, usa patay
CEBU, Philippines — Patay ang usa ka Grab driver samtang laing usa sab ka delivery driver ang naangol human silang duha gidaro sa usa ka sports utility vehicle diha sa Gov. Cuenco Avenue, Banilad Siyudad sa Sugbo, kagahapon sa alas- 4 sa kaadlawon adlaw nga Sabado.
Patay na nga nalandig sa Cebu City Medical Center (CCMC) si Basilyo Labandero Lopez Jr., 55, samtang ang naangol mao si Ryan Navaja Lamita, 26, taga Pagsabungan, Siyudad sa Mandaue.
Ang maong SUV gimaneho ni Romel Langcob Paloma, 32, residente usab sa Siyudad sa Mandaue nga drayber sa usa ka dakong kompanya.
Sa imbestigasyon sa Cebu City Police Office, ang duha ka riders naa nag-parking sa daplin sa karsada nianang tungora.
Apan kalit lang matud pa gidaro kanila ang kusog nga nagdagan sa SUV hinungdan sa ilang pagkalagpot ug pagkagusbat sa ilang mga motor samtang ang maong sakyanan nagusbat sab ang atubangang bahin niini.
Dali nga gidala ang mga biktima sa tambalanan apan gideklarar nga dead on arrival si Lopez pagabot sa CCMC , samtang ang drayber sa SUV kinsa nakaangkon sab og kadaut sa lawas tungod sa pagbangga gidala kini sa Chong Hua Hospital.
Ang kapolisan nag-andam na sa kasong Reckless Imprudence in Homicide and Physical Injury with Damage to Property kun ang pamilya sa mga biktima modesider sa pagsang-at og kaso. (BANAT NEWS)
- Latest
