Pag-vandal sa tulo ka heritage sites ipa-imbestigar ni Garcia

CEBU, Philippines — Gimandu karon ni acting mayor Raymond Alvin Garcia, sa Dakbayan sa Sugbo ang pagpahigayon og imbestigasyon sa giingong pag vandal sa tulo ka mga heritage site o mga dapit sa kabilin sa kultura, tradisyon ug relihiyon sa mga Sugbuanon.

Sa nasayran ang tulo ka mga heritage site nga gipang vandal mao ang bongbong sa Basilica Minore del Santo Niño diha sa gawas nga bahin sa Aula Hall ug Sintra board wall sa hagdanan sa Cebu Chinese Heritage Museum.

Ang gisulat mao ang black rainbow gamit ang usa ka itom nga pentel pen.

Matud pa ni Garcia, iyaha kining pa imbestigahan ug ipasusi sa City Historical Affairs Office, Parks and Playgrounds lakip usab sa kapolisan.

Nagkanayon ang acting mayor nga angayan gayud ampingan ug hatagan og bili ang mga heritage site sa siyudad diin makita ang kabilin nga puno kaayo sa kasaysayan nga kabilin sa katigulangan nga Sugbuanon nga maoy ikapasigarbo sa Sugbo ilabi na ngadto sa mga dumuduong.

Ang City Administrator mao ang makig-alayon sa kapolisan alang sa himoong imbestigasyon.

Ang maong paghugaw hugaw gituhuan nga gihimo atol sa gabii sa kabilin niadtong Mayo 10, 2024 diin ang maong mga museum gibuksan kini ngadto sa publiko.

Tinguha ni Garcia nga masayod usab sa resulta sa imbestigasyon kabahin niini ug dili na siya buot nga masubli pa kini tungod sa ka impotante sa mga dapit nga nagpreserbar sa kasaysayan sa Sugbo. (BANAT NEWS)