Namaligya’g pekeng government ID nadakpan

CEBU, Philippines — Nagtingkagol sa karsel sa National Bureau of Investigation ang usa ka 29-anyos nga babaye nga nasikop sa entrapment operation sa NBI kauban ang Bureau of Internal Revenue tungod kay namaligya kini og mga pekeng ID ug dokumento sa Dakbayan sa Naga.

Sa usa mga video nga kuha sa NBI-CEVRO,  si Verlyn Subrian nasakpan sa akto nga namaligya og pekeng BIR TIN cards ug Philhealth cards.

Ang maong entrapment operation sa NBI ug BIR nahitabo niadtong Septiyembre 24 sa gabii sa East Poblacion sa Siyudad sa Naga. Nakuha gikan sa dinakpan ang mga peke nga mga I.D.

Matud pa ni Atty. Renan Augustus Oliva, Director sa NBI-CEVRO kining mga pekeng ID sa gobiyerno gigamit sa mga tawo sa krimen sama sa mga nalambigit sa POGO nga nahitabo sa ubang mga dapit sa nasod.

Sama nalang sa mga langyaw nga gustong mogamit og ngalan Pilipino aron makahimo og transaksyon sa nasud.  Ang impormasyon bahin sa modus sa suspek nagagikan sa laing tighimo sab og pekeng IDs nga nadakpan sa NBI sayo ning buwana.

Si Atty. Isaac Dacera III, sa Legal Division sa BIR sa Sugbo nagpasalamat sa malampusong operasyon ug mipahimangno sa publiko nga libre ang pagkuha og TIN ID ngadto sa ilang buhatan ugmahimo usab kining makuha pinaagi sa online sa ilang website.

Ang suspetsado niangkon nga gikan sa kaulohan ang pagprinta niini sa BIR ug PhilHealth Cards nga gipadala kaniya ug igo lang siya namaligya niini.

Ang kalisod maoy nagtukmod kaniya sa paghimo niini tungod duna siyay duha ka mga gagmay nga anak. Ang maong transaksyon sa ginang iyaha na kining gimantala diha sa social media.--  IBM BANAT NEWS