Mga batabata sa namusil og tanod nadakpan

CEBU, Philippines — Upat ka bata-bata niadtong suspek nga namusil sa hepe sa tanod sa Candulawan, Talisay City nadakpan sa kapolisan atol sa buy bust operation sa managlahing dapit sa siyudad.

Unang operasyon nahimo sa purok Tambis, Barangay Jaclupan diin nasikop sila si Adrian Chester Paran, 24, ug si Edward Butron, 20, nga nakuhaan og 50 gramong gituohang shabu nga gibana-bana nga balor nga P340 mil.

Sa sunod operasyon gihimo sa sitio Lasco, Barangay Lagtang ug nasikop sila si Junrey Abatayo, 32, ug si Aquiles Rebonza, 31.Nakuhaan sab sila og shabu nga nitimbang og 1.15 gramo nga gibana-bana nga balor P1,020 ka pesos.

Matud pa sa kapolisan mga bata-bata sila ni alyas Tiyan kinsa giingong nag-supply og drugas ug sila maoy tigbaligay niini.

Si alyas Tiyan gikatahong nagdumot ug nibahad nga panghutdon niya og pusil ang mga tanod sa Barangay Candulawan human usa nila ang nipatay sa igsuon niini.

Sa pikas bahin, nadakpan sa mga operatiba sa Regional Police Drug Enforcement Unit(RPDEU) sa Police Regional Office(PRO)-7 ang usa  ka bag-ong laya atol sa buy-bust operation sa Sitio San Vicente, C. Padilla Street, Barangay Duljo Fatima, siyudad sa Sugbo  niadtong Huwebes sa gabii Septiyembre 26, 2024.

Ang nadakpan mao si Arjay Siarot Dayondon, 31, residente sa Sitio Mansanitas, Barangay Duljo Fatina ning siyudad ug nakuhaan matud pa og 130 gramos nga gituohang shabu nga nagkantidad og P844 mil. Gikatahong napriso kini sulod sa lima ka tuig diha sa Cebu City Jail ug karong tuig lang kini nakagawas. 

Samtang usa ka high value individual ang nadakpan sa mga operatiba sa Police Drug Enforcement Unit(PDEU) sa Bohol Police Provincial Office(BPPO) atol sa ilang buy-bust operation sa Purok 4, Barangay Anislag, Lungsod sa Corella, Probinsiya sa Bohol.

Ang nadakpan mao si Renedette Goloso, alyas Badet, 35 , taga Purok-2B, Barangay Cabawan, Tagbilaran City. Nasakmitan ang suspetsado og 160 gramos nga gituohang shabu nga nagkantidad og kapin P1 milyon.

Nasayran nga nadakpan niadtong 2020 ang suspek  tungod gihapon sa sa illegal nga drugas  ug ang kaipon niini usa ka convicted drug personality nga naa karon sa Abuyog Penal Colony sa Leyte.  Kasong kalapasan sa Section 5 ug 11, Article II sa Republic Act 9165 ang ipasaka batok sa mga dinakpan. –Decemay P. Padilla ug Romeo Marantal/IBM BANAT NEWS