Barato nga bugas mapalit na sa probinsiya sa sugbo

CEBU, Philippines — Ibalik na sa Kapitolyo sa Sugbo ang pagpatuman sa subsidized rice program niini alang sa mga kabus nga Sugboanon.

Kini human nga ang National Food Authority (NFA-7) gikatakda nga modeliver sa Kapitolyo og inisyal nga 5,000 ka sako sa bugas.

Ang programang Sugbo Merkadong Barato o SMB, nga usa ka flagship program sa administrasyon ni gobernador Gwendolyn Garcia gikatakda nga iimplementar og balik.

Tinguha sa maong programa nga makapalit ang mga Sugboanon sa barato nga presyo sa bugas ilabina kadtong mga kabus nga giila ug gi screen sa Department of Social Welfare and Development (DSWD).

Ang NFA 7 OIC director Ovelito Baritua atol sa tigom uban ni Garcia misaad nga ang ahensya mopadala og 5,000 ka sako sa bugas nga maoy gamiton sa Kapitolyo alang sa programa niini.

Si Garcia nagkanayon sa pagbalik sa SMB, ibaligya sa Kapitolyo ang bugas og P29 matag kilo. Mas taas taas kini sa unang P20 matag kilo nga baligya kaniadto ubos sa SMB sa wala pa kini mapahunong.

Nisunod usab kini sa national version nga programa ni Presidente Ferdinand Marcos Jr. pagbaligya sa bugas og P20 matag kilo, nga mas ubos ubos sa kasamtangang presyo sa bugas sa mga merkado nga anaa sa P50-60 matag kilo.

Si Garcia nagkanayon nga limitado ra sab ang ilang pagbaligya niini diin tulo ngadto sa lima ka kilo lang matag semana ang mamahimong mapalit sa mga kabus. Kini aron malikayan nga adunay pag-abusar diin ang mga mopalit sa SMB og bugas nga tag P29 matag kilo ibaligya sa gawas og mas taas nga presyo.

Si Birtua nagkanayon nga modugang og suplay ang NFA sa Probinsya sa Sugbo kon kinahanglan sanglit naghulat pud sila sa moabot nga dugang stock sa bugas. — /MEL (BANAT NEWS)