Duha gipamusil sa menor de edad

CEBU, Philippines — Duha ka mga lalaki ang nalandig sa tambalanan human sila gipamusil diha sa Barangay Pulpogan sa Lungsod sa Consolacion alas 12 pasado sa miaging Domingo sa tungang gabii.

Ang mga biktima giila sa kapulisan nga sila si Kent  Ashley Guinto,19, taga Barangay Pulpogan, Consolacion nga naigo  sa ulo samtang ang ikaduha mao si Inosentes Bercide Covarde, 49, minyo ug nagpuyo sa maong barangay nga naigo sab sa tuong bahin sa iyang lawas.

Si Police Lieutenant Colonel Ruel Burlat, hepe sa Consolacion Police Station miingon nga sa inisyal nila nga imbestigasyon nagbarog sa daplin sa dalan ang duha dihang kalit sila nga gipamusil.

Ang suspetsado nga nailhan lang nga alyas nga "Tigas" usa ka minor de edad. Dalidali kining misibat pahilayo.

Ang mga biktima dali nga gidala ngadto sa Eversely Child Sanitarium General Hospital sa Barangay Jagobiao, Siyudad sa Mandaue ug padayon pa kining giatimamn sa mga doktor.

Ang kapolisan nipahigayon og hot pursuit operation aron madakpan ang suspek. Wala pa matino kun unsa ang motibo sa maong pagpamusil. — /IBM (BANAT NEWS)