Walo ka lungsod nagbahin sa P20.8M ayuda sa Kapitolyo

CEBU, Philippines — Moabot sa P20.8 ka milyones nga kantidad nga tabang pinansyal ang gihatag sa Probinsiya sa Sugbo ngadto sa walo ka local government units (LGU) ikapitong distrito.

Si Gobernadora Gwendolyn Garcia maoy mismo mitunol og tseke ngadto sa mga mayor sa matag lungsod atol sa gipahigayon nga caravan of services sa lungsod sa Moalboal.

Kini mao ang Dumanjug, Ronda, Alcantara, Moalboal, Badian, Alegria, Malabuyoc ug Ginatilan para gamiton sa ilang proyekto sa imprastraktura.

Gawas niini, tulo pud ka barangay sa matag LGU ang nakadawat og tag P200,000 nga tabang gikan sa Kapitolyo alang sa ilang nagkadaiyang programa niini. Ang mga barangay kapitan maoy nidawat sa tseke gikan sa gobernador.

Atol pud sa maong caravan, dili momenus lima ka mananaog sa Sugbusog Season 4 sa Best Purok Category ang nakadawat sa ilang ganti sa Kapitolyo.

Nadawat sa mga mananaog ang tag duha ka baboy. Subay sab kini sa gikatakda nga paglusad sa Sugbo Baboyan program sunod bulan sa Probinsiya sa Sugbo.

Ang Badian Police Station nakadawat pud og bag-ong Sugbo Cop pick-up human nga nahimong district winner sa Sugbusog Sa Estasyonan. Ang Badian District Hospital nakadawat pud sa Lite Ace Van human maoy nidao sa Provincial Level sa Sugbusog sa Ospital Season 2. (BANAT NEWS)