Pito ka shipyards sa Consolacion pabalhinon sa norte

CEBU, Philippines — Dili momenus pito ka mga shipyard companies nga nag-operate sa lungsod sa Consolacion ang gihangyo nga mobakwit ug mobalhin sa mga lungsod o siyudad sa amihanang bahin sa Sugbo.

Kini human ang lokal nga kagamhanan sa lungsod sa Consolacion mipadayag nga ang nahimutangan aning maong mga kompaniya kabahin sa giila nga tourism zone sa lungsod ug usa sa concern ang compliance o pagsubay sa Comprehensive Land Use Plan sa LGU.

Atol sa pakigtigom ni Gobernador Gwendolyn Garcia uban sa mga representante sa mga shipyards ug ni Consolacion Mayor Teresa Alegado, siya mipadayag nga andam ang Kapitolyo motabang sa maong isyu aron makahimo og amicable settlement o solusyon inay moadto sa korte.

Sumala sa Sugbo New, ang news arm sa Kapitolyo nga upat ka kompaniya ang misaad nga mobalhin sa Tabogon o Bogo City samtang ang nahabilin nag-hunahuna pa sa ubang opsyon nga pwedeng himoon.

 Mihatag nuon si Garcia og inisyal nga unom ka bulan aron mopadangat og interes nga mobalhin ang maong mga kompaniya.

Si Tabogon Mayor Francis Salimbangon ug Bogo City Mayor Carlo Jose Martinez parehong mihangop sa posibilidad nga adto sa ilang lugar mobalhin ang mga shipyards.

Si Salimbangon nagkanayon nga ang pagbalhin sa maong mga kompaniya didto sa ilang lungsod dako ang matabang sa Tabogon hilabina sa ilang ekonomiya.

 Gani mi-offer si Salimbangon nga adto sa coastal barangay sa Alang-Alang ug Maslog ang relokasyon sa maong mga kompaniya. Sa Bogo, si Martinez mitanyag pud sa ilang industrial zone duol sa Brgy. Pulang Bato Port.

Ang Consolacion nagplano pagpatuman na sa developmental plan sa nahisgotang area sa Barangay Tayud alang sa  235 ka ektarya nga reclamation project sa coastal area sa maong barangay nga mo-feature og mixed-use commercial, industrial ug tourism hub sa lungsod. (BANAT NEWS)