CEBU, Philippines — Gipadayag ni Cebu City Councilor Pastor “Jun” Alcover nga aduna siyay igong ebidensya nga ikapresentar sa imbestigasyon sa giingong irregularities sa Cebu City Agriculturist karong Mayo 9, 2024.
Sa pakighinabi sa The Freeman, si Alcover niingon nga bisan og una niyang giduso ang pag-resign sa Cebu City Agriculture Department Head (CAD), nga si Joelito Baclayon andam siya nga mopatim-aw sa imbestigasyon dala ang mga ebidensiya nga iyang nahipos.
Gikuwestiyon hinuon niya ang plataporma sa imbestigasyon nga nag-ingon nga atol sa executive session atubangan sa Cebu City Council, si Baclayon giingong wala maka-justify nganong wala magamit ang P85 milyones nga budget alang sa CAD.
Matud ni Alcover, adunay ipahigayon nga imbestigasyon alang sa giingong “irregularities” ni Baclayon karong Mayo 9, 2024 diin matod niya andam siyang mopakita sa iyang ebidensiya.
“Pareha karon, ang ilang ipanghatag baril ug tubo, unsaon pag gamit anang baril ug tubo nga nauwahi naman na, wa may tubig,” matud ni Alcover.
Samtang gipaabot nga moduso si Alcover og mga resolusyon nga mangayo kang Baclayon og imbentaryo sa pagpalit og mga plastic drums, water pumps, cultivators, ug tractors sukad sa iyang pagkatudlo isip city agriculturist. (BANAT NEWS)