PRO-7: Fake money posibleng ipakatap

CEBU, Philippines — Giawhag sa Police Regional Office (PRO)-7 ang publiko nga magbinantayon niining peke nga kwarta sanglit wala nila gisalikway ang posibilidad nga gamiton kini ilabi na karong Semana Santa.

Matud ni Police Lieutenant Colonel Gerard Ace Pelare, tigpamaba ni PRO-7 Regional Director Brigadier General Anthony Aberin nga modus gyud sa mga mangingilad nga kun dunay mga aktibidad mopahimulos sila pinaagi sa paggamit og peke nga kwarta.  Nagkanayon si Lt. Col. Pelare nga ang mga police station sa Central Visayas abli 24 oras ug pwede kini adtuon kun pananglitan dunay mga pagduda kun peke o tinood ang kwarta.

“Directly coordinate with our police station so that they will facilitate also in the determinatio whether or not the bill is fake or genuine,” sigon ni Pelare.

Sigon ni Pelare nga angayang masayod ang publiko nga kun dunay economic activity o kalihukan nga maka-generate og economic flow mopahimulos gyud ning mga kriminal.

Dili lang kining mga peke nga kwarta ang bantayanan apan apil na ang mga tulisan, kawatan ug snatcher hinungdan nga samtang naglingaw-lingaw sa taas nga bakasyon ug nag obserbar sa Semana Santa magmatngon gihapon sa mga gamit.

Giklaro ni Pelare nga luwas ang Central Visayas apan duna gyud sila’y mamonitor nga mga kriminal nga gikan sa laing lugar nga modayo lang sa Rehiyon aron mohimo og dautan.

“Makita ninyo Sinulog daghan kay nadakpan, tulisan,kawatan ug mga snatchers,” ni Pelare pa. — IBM BANAT NEWS