Visayan Electric niawhag sa pagdaginot sa kuryente

CEBU, Philippines — Samtang nagpungasi ang kainit sa panahon giawhag sa Visayan Electric ang ilang mga konsumidor nga hingusgan ang naandan nga mga lakang sa pagdaginot sa kuryente.

Mao kini ang magsilbing tubag alang sa panahon sa ting-init nga unang gideklara sa Philippine Atmospheric, Geophysical, and Astronomical Services Administration (PAGASA). Gawas sa Sugbo, ang nagkadaiyang dapit sa Central Visayas ang nakasinati usab og grabeng kainit sa panahon.

Gihatagan og gibug-aton sa Visayan Electric ang pagdaginot sa kuryente ingon man usab ang kasamtangang sitwasyon sa panahon.

Si Engineer Raul Lucero, presidente ug COO sa Visayan Electric niawhag sa mga konsumidor alang sa pagbinantayon kanunay ilabi na sa kainit sa panahon.

"I encourage everyone to stay hydrated and limit outdoor activities, especially during the peak of the day's heat", matud ni Lucero.

Matud ni Lucero nga kinahanglang adunay hustong bentilasyon ang balay ug magdaginot sa paggamit sa energy-intensive cooling appliances sama sa airconditioners.

Gipahimagnoan usab sa Visayan Electric ang ilang mga konsumidor nga gikinahanglan nga i-unplug  ang appliances nga wala gamita. BDB BANAT NEWS