LED wall sa stage sa Cebu City Sports Complex natumba, batang propsman naigo

CEBU, Philippines — Giingong usa ka bata nga propsmen para sa Sinulog sa Kabataan sa Dakbayan sa Sugbo karong adlaw nga Domingo ang giingong nakaangkon og gamay nga kadaut sa lawas human naigo atol sa pagkatumba sa light emitting diode (LED) wall nga gitaod diha sa entablado sa Cebu City Sports Center kagahapon sa udto samtang sila nag praktis.

Matud pa ni Red Oliveros, choreographer sa Banilad, giingong isolated ra ang maong panghitabo ug wala silay gibasol tungod kay aksidente man kini.

Apan ilang hangyo sa mga naginstalar niini nga mas palig-onon pa ang gipanginstalar nga gamitonon sa maong event  sa mga manayaw nga mga kabataan. Sumala pa ni Oliveros, iyang nabatyagan paghangad niya nga nayagyag na ang led wall. Ang bata gidala sa tambalanan.

Gitug-an ni Oliveros nga kusog gayud ang hangin adtong tungora sa dihang nayagyag ang led wall. Ang LED wall maoy maghatag og dugang background sa pasundayag diha sa entablado.

Base sa pamahayag sa pipila ka mga tawo sa maong lugar, lakip usab unta sa maigo ang usa ka dancer apan natukmod kini sa maong propsman nga maoy naangol.

Sa pagsubay sa Banat News human sa hitabo nabantayan nga kusog gyud ang hangin sa maong dapit.

Ang maong insidente ipaimbestigar sa mga kadagkuan sa CDRRMO ug lakip usab sa mosusi ang OBO.

Ang Executive Director sa Sinulog Foundation Inc. Elmer ‘Jojo” Labella, nitug-an nga aduna pay imbestigasyon nga himoon may kalabutan sa maong insidente ug mopagawas ra unya sila og panahom may kalabutan niini. (BANAT NEWS)