Kanhi publisher sa The Freeman, Jerry Tundag, mitaliwan

CEBU, Philippines — Nagbangutan karon ang Cebu media nunot sa pagtaliwan sa usa sa mga labing lig-ong haligi sa industriya nga si Jeremias "Jerry" Suico Tundag kagahapon adlaw nga Biyernes, Disyembre 8 sa edad nga 70 anyos.

Mismo ang kapikas ni Tundag nga si Arlinda maoy mipahibalo niini pinaagi sa social media aron ipahibalo sa mga kabanay, mga kaila, kahigalaan ug kanhi mga kaubanan sa media sa iyang bana ang pagtaliwan niini.

"It is with the heaviest heart that we announce the passing of the most loving father and husband, Jerry Tundag. Jerry has long stood as one of Cebu media's forefronts, dedicating most of his life to bringing the truth through his writing," matud niya.

Si Tundag lumad nga taga  Cabadiangan sa lungsod sa Compostela. Nagsugod siya sa iyang karera sa journalism sa dihang staff writer pa sa The Visayanian, ang opisyal nga publikasyon sa University of the Visayas (UV).

Gikuha siya ni anhing Dr. Jose "Dodong" R. Gullas aron pasuwaton sa igsuong pamantalaan sa Banat News nga The Freeman niadtong dekada 80.

Gikan sa pagka reporter, nahimo siyang managing editor, editor-in-chief hangtud nahimong publisher. 

Kaduha siya nahimong delegado sa ASEAN Editors' Conference, girepresentar sab niya ang Pilipinas sa 1992 Fulbright-sponsored International Visitor Program nga giapilan sa 16 ka ubang mid-level editors  gikan sa lain-laing mga nasud pinaagi sa imbitasyon sa gobiyerno sa Amerika.

Bisan niretiro na siya sa The Freeman, padayon siyang nagsuwat isip kolumnista sa iyang lindog nga "To The Quick."

Ang The Freeman ug Banat News nipaabot sa pahasubo sa pamilya ni Tundag.

"During his time, he not only steered our editorial team with unwavering dedication but also left an indelible mark on our publication. His passion and commitment to excellence will be remembered. May his legacy continue to inspire and resonate in the hearts he touched," sumala pa sa pamahayag.

Mismo si Cebu City Mayor Michael Rama kinsa toa pa sa Australia pagkasayod sa nahitabo personal nga mitawag sa The Freeman aron ipaabot ang iyang pahasubo ngadto sa pamilya ug sa pamantalaan.

“He is a very good journalist…Par excellence, so humble yet profound in his writing. I consider him a friend.. Constructive friend and journalist..His writing, beyond compare. His demeanor, he was just not a brag …considering he was already the editor-in-chief and publisher of The Freeman…He will be missed,” dugang pa sa mayor.

Gibilin ni Tundag ang iyang kapikas nga si Arlina ug mga anak nga silang   Carmel, Lia, ug Nina. Ang iyang haya naa sa ilang panimalay sa 1050 Mabini Street sa Jugaban, Carigara, Leyte. — IBM (BANATNEWS)