CEBU, Philippines — Aduna nay gisubay ang Cebu City Police Office (CCPO) nga lead mahitungod sa nahitabong pagpamusil sa usa ka bakeshop diha sa Tabura Street, Barangay Pardo sa siyudad sa Sugbu.
Wala una hinoon gibutyag sa kapulisan kun unsa sanglit padayon pa ang ilang pagpalawom sa imbestigasyon aron mailhan ug madakpan ang mga mamumuno.
Apan sigon ni Police Lt. Col. Janette Rafter, Deputy City Director for Operation ug tigpamaba sa Cebu City Police Office nga naalarma ang mga tawo sa dapit bahin aning mga pagpamusil.
Si CCPO Director Colonel Ireneo Dalogdog , direktor sa CCPO miingon nga tanang kaso sa pagpamusil kinahanglang susihon ug sulbaron.
Nahibaw-an sa imbetigasyon base sa kuha sa CCTV camera, kadtong lalakeng nagbarog gawas bakery dili maoy target sa riding-in-tandem nga mga mamumuno kondili ang tindahan gyud.
Matud ni Rafter dili indiscriminate firing ang nahitabo kay dunay target ang mga mamumuno. — IBM (BANATNEWS)