Notadong kawatan gipadakop sa iyang igsoon
CEBU, Philippines — Gipadakop sa iyang kaugalingong igsuon ang notadong kawatan human kini miunay sa pagkawat sa iyang cellphone diha sa ilang pinuy-anan sa Isla Verdi, Barangay San Isidro, Dakbayan sa Talisay. Ang pagpangawat nahitabo niadtong Martes sa gabii ug nasikop ang suspek nga si Bryan Besin alyas Bry-Bry kagahapon sa kadlawon.
Sa inisyal nga imbistigasyon sa kapolisan nasuta nga gikuha sa suspek ang cellphone sa iyang igsuon nga mokantidad og P14mil ka pesos nga walay pagpananghid.
Nisumbong ang biktima sa kapolisan ug nisaysay nga notado na gyud ang iyang igsoon sa pagpangawat ug gusto siya nga patagmon gyud kini. Si Police Corporal Eleazar Belciña niingon nga makapila na ka higayon nga gireklamo sa pagpangawat ang suspek ug gani bag-o lang kini nga nakagawas sa bilangguan.
Ang operatiba nilahos sa lungsod sa Boljoon human sila nakadungog nga naa ang suspek nagtago-tago sa ilang paryenti sa dapit.
Tuod man nadakpan gyud ang suspetsado ug gitanggong sa bilangguan.
Nagkanayon si Belciña nga andam mopasaka og kaso ang biktima aron maleksyon ang iyang igsuon nga kawatan. — MEL (BANATNEWS)
- Latest
