100 nigradwar sa IT BPM Scholarship Program sa Danao

CEBU, Philippines — Ang Dakbayan sa Danao padayon nga nagpalambo sa ilang status isip future IT hub sa Sugbo ubos sa ilang labing una nga IT BPM Scholarship Program graduation ceremony niining ulahi lang.

Ang seremoniyas nagpasidungog sa 100 ka pioneering graduates, lakip ang 75 gikan sa Contact Center Services NCII ug 25 gikan sa Events Management Services NCIII.

Matud sa kagamhanan sa siyudad nga ang IT BPM Scholarship Program graduation ceremony nagtimaan sa unang hugna sa sa ebolusyon sa Dakbayan sa Danao nga nahimong key player sa industriya sa IT BPM.  Nitambong sa graduation rites si Mayor Mix Durano, Bise Mayor Nito Durano ug dignitaries kinsa nitimbaya ug nipakita sa ilang suporta ngadto sa mga graduate.

Sa laing bahin, ang IT BPM companies magtigom diha sa Dakbayan sa Danao alang sa investment forum ug job fair sa Septiyembre 22, 2023.  Ang maong umaabot nga kalihokan maghatag uog daghang kahigayonan sa pagpanarbaho dili lang sa mga Danawanon apan lakip na ngadto sa mga Sugboanong komunidad.

Sayo pa, ang kagamhanan sa siyudad nihatag og 11 ka school buildings nga nikatantidad tanan ngadto sa P20.8 milyones ngadto sa Department of Education Danao City Division.

Ang mga recipient nga eskwelahan gilangkuban sa Bibiana Mercado Integrated School; Guinsay Elementary School; Quisol Integrated School; B. Durano Integrated School; Bayabas Integrated School; Cambubho Integrated School; Santikan Elementary School; Raymunda B. Hermosilla Integrated School; Eduardo Gorre Integrated School; Sta. Rosa Integrated School; ug Gerardo Ypil Integrated School. — /BDB (BANAT NEWS)