Mga konsumidor dunay refund sa singil sa Visayan Electric
CEBU, Philippines — Ang mga pamilyang konsumidor sa Visayan Electric hatagan og usa ka higayon nga refund nga P3.0002 matag kWh alang sa ilang bayronon gikan sa Agosto 13 hangtod sa Septiyembre 12 tungod sa mga over-recovery sa pass-through charges gikan sa Enero hangtod Hunyo karong tuiga.
Kadtong mokonsumo og average nga 200 kWh makadaginot og hangtod sa P600 alang niini. Ang maong refund, i-deduct sa bayronon sa kustomer sa sunod nilang bill subay sa Energy Regulatory Commission (ERC) Resolution No. 14 nga miusab sa mga lagda sa pagbawi sa pass-through charges nga nakolekta distribution utilities.
Ang mga over-recovery o sobrang nasingil ingon man kadtong kuwang sa pagsingil dili angay ikahibulong matud pa sa Visayan Electric.
Kini tungod sa deperensiya sa oras sa billing schedules ug rates nga gigamit sa power suppliers sa pagpaningil sa Visayan Electric ngadto sa billing schedules ug rates sa Visayan Electric sa pagpaningil sa mga kustomer niini.
“ERC Resolution 14, which takes effect this year, has actually made the process of refund for over-recoveries easier. Which is why, when Visayan Electric breached the 10 percent threshold allowed by the commission, we immediately prepared for the implementation of the refund,” matud pa ni Visayan Electric President and Chief Operating Officer, Engr. Raul Lucero.
Ang pag-ubos sa gasto sa kuryente sugod sa Enero hangtod sa Hunyo ning tuiga maoy rason nganong nisobra ang nakolekta sud sa nakalabay nga unom ka buwan ug kini i-refund pinaagi sa pag-deduct sa sunod nilang bill.
Ang dili residential consumers makadawat gihapon og refund apan depende kun asa sila nasakop. (BANAT NEWS)
- Latest
