CEBU, Philippines — Nagkagubot ang pipila ka kabataang Children in Conflict with Law (CICLs) diha sa Operation Second Chance niadtong adlaw’ng Biyernes human dunay usa kanila ang giingong nanunggab.
Sigon ni Police Colonel Ireneo Dalogdog, City Director sa Cebu City Police Office nga alas-5 sa hapon niadtong adlaw’ng Biyernes nakadawat og report ang Guadalupe Police Station 9 nga dunay insidente sa pagnunggab sulod sa maong pasilidad.
Migawas sa imbestigasyon base sa testimonya sa Chief Security sa Operation Second Chance nga si Eliseo Famador Sr., dunay CICL nga nasuko sa dihang gimandoan nga pasudlon sa kusina alang sa pag-ihap.
Giingong nitubag-tubag kini maong mipatunga ang team leader nila nga CICL ra pud. Apan giingong nasuko kini ug niresulta na hinuon sa panaglalis.
Ang batan-on gikatahong nidagan sa kusina ug nikuha og kutsilyo dayon giwarawara kini ngadto sa mga kauban.
Naginilogay sa kutsilyo ang mga bata hinungdan sa pagkasamad sa mga kamot sa duha ka CICLs nga nitabang pagdisarma kaniya.
Gidala sa tambalanan ang mga nasamdan hinuon gagmay ra kini nga mga samad ug nabalik na sab sila dayon sa pasilidad.
Bisan pa sa nahitabo, wala gisuspenso ang dalaw sa mga bata. Wa say gibutyag kun unsa gibuhat karon sa OCS sa batang nagwala.
“Wala man hinoon serious physical injury nga nahiagom…Gitahasan na sab ni Mayor si Police Lt. Col. Conrado Manatad, Deputy City Director for Administration nga i-supervise ang maong pasilidad. …adun sila’y pagahimoon nga inspections sa sulod kay basig naay mga deadly weapons didto mismo sa establisemento unya basin naa sila’y mahatag nga recommendation after the inspection,” sigon ni Dalogdog. (BANAT NEWS)