PSA mipahibawo nga na hacked ang ilang FB Page

CEBU, Philippines — Opisyal na nga gi-anunsyo niadtong Hulyo 24, sa Philippine Statistics Authority – Central Visayas nga na hacked ang Facebook Page sa Philippine Statistics Authority – Region 7 diin nagpagawas sila og Public Advisory isip pagpahibawo sa maong panghitabo.

nabantayan nga sa niaging mga adlaw adunay mga litrato sa Philippine Statistic Authority – Region 7 ang nanggawas diin ang profile ug cover page niini nailisan na og dagway sa usa ka babaye ug managhigugmaay hinungdan nga nadudahan kini sa kadaghanan kay sukwahi na man kini sa makanunayong post sa maong ahensya.

Mas nitaas usab ang pagduda sa kadaghanan nga na hacked kini kay ang maong Facebook page adunay nay blue “authentic” nga checkmark isip pag verify nga lehitimo ang maong social media page.

Ang PSA – Misamis Oriental usab mi-kompirmar niadtong Hulyo 23, adlaw nga Domingo sa mao nga panghitabo. Matud pa nga ang maong page na hacked niadto pang Pebrero 22, 2023 ug sukad niadto ang maong ahensya wala na gayud maggamit niini.

Segun sa Public Advisory sa PSA Central Visayas ang maong panghitabo na report na ngadto sa Meta, Cybercrime Investigation and Coordinating Center (CICC) ingon man sa mga nagpakabana nga mga ahensya.

Giawhag usab ang publiko sa pagreport sa mao nga account ug i-unfollow kini.

Ang Philippine Statistics Authority – Central Visayas mao na ang bag-ong Facebook page sa maong ahensya, ug mao na ang mopadayon sa paghatag sa mga updates ug mga balita mahitungod sa kalambuan og mga aktibidad sa PSA Central Visayas busa gi-awhag ang tanan sa pag like ug follow sa bag-o nga page aron mahimong updated sa mga nag-unang balita. (BANAT NEWS)