CEBU, Philippines — Nalumos ang usa ka 55-anyos nga babaye samtang naligo diha sa dagat sa Borromeo Beach, Barangay Pooc, Dakbayan sa Talisay kagahapon sa buntag.
Ang nalumos mao si Vivian Canasa, minyo, lumulupyo sa Upper Mohon, sa nahisgutang siyudad.
Si Canasa aduna kini giinom nga maintenance alang sa high blood pressure niini.
Ang kapolisan sa Talisay City Police Station nakadawat og taho gikan sa usa ka concerned citizen mga alas 12:30 na sa hapon kabahin sa maong insidente.
Ang anak ni Canasa nga si Crislyn Barliso Canasa nagkanayon nga sayo sa buntag ang iyang inahan nianha sa baybayon aron maglingaw-lingaw ug samtang naglingkod kini daplin sa baybayon kalit lang kini nga nahagba diha sa tubig nga nag-una ang nawong.
Ang pamilya ni Canasa giingong dili na interesado sa pagpahigayon og imbestigasyon ug pagpasaka og report ngadto sa police station tungod kay nagtuo sila nga walay foul play ang kamatayon ni Canasa. — Romeo D. Marantal/BDB (BANAT NEWS)