CEBU, Philippines — Laing nasudnong pasidungog ang nadawat ni Mayor Junard “Ahong” Chan gikan sa Office of the President pinaagi sa Anti-Red Tape Authority kon ARTA nga mao usab ang Accelerating Reforms for Improved Service Efficiency Awards kon ARISE Awards.
Matud pa ni Chan, siya lang ang nag-inusara nga siyudad gawas sa NCR nga nakadawat sa maong prestihiyosong award, kauban niya ang Luzon sama sa Maynila, Parañaque, Muntinlupa, Navotas, Valenzuela, ug Marikina.
Nagkanayon ang mayor nga usa sa mga gilantaw niya nga hinungdan nga nakadawat siya sa maong pasidungog mao ang iyang compliance sa Electronic Business One-Stop Shop nga hinungdan sa mas paspas ug hapsay nga transaksyon sa mga tax payer sa pag proseso sa ilang business permits, real property taxes ug uban pa nga mga frontline services.
Dugang pa ni Chan, pinaagi sa ilang paningkamot sa digitalization ilang nahatagan ug katumanan ang panawagan sa presidente nga mapalambo pa ang bureaucratic efficiency sa nasud.
Ang maong award usa ka kamatuoran sa ilang dedikasyon sa pagputol sa red tape ug paghangop sa digitalization aron mas paspas ug hapsay ang serbisyo sa publiko.
Gipasalamatan sa mayor ang tanan niyang mga kaubanan, mga kaabag, Department Heads ug ni Congresswoman Ma. Cynthia “Cindi” King Chan, lakip usab sa mga Oponganons sa kalampusan nga ilang naangkon. MEL (BANATNEWS)