CEBU, Philippines — Nadawat na sa provincial board members lakip ni Bise Gobernador Hilario Davide III ang mga bag-ong sakyanan gikan sa Probinsiya sa Sugbo.
Ang maong mga sakyanan gibendisyonan kagahapon ug gi-turnover ngadto sa mga bokal ang ilang Toyota Hilux Conquest ug Toyota Fortuner alang kang Davide.
Ang kalihokan gipahigayon diha sa gawas sa legislative building sa Cebu Capitol compound.
Si Gobernador Gwendolyn Garcia nagkanayon nga maisip kini nga “token of appreciation” niya sa mga bokal kinsa kanunay’ng nisuporta sa iyang mga programa ug proyekto sa probinsiya hilabina sa pandemiya sa COVID-19.
Matud ni Garcia nga daghan siya’ng giluwat nga mga kamandoan ug polisiya nga gipaluyohan usab sa Sangguniang Panlalawigan og ordinansa.
Si Garcia nagkanayon nga dako na usab ang gasto sa mga karaan nga sakyanan sa mga bokal nga ilang gigamit sulod na sa sobra sa lima ka tuig.
“So it’s time that you should be given brand new and brand that is also highly regarded”, ni Garcia pa.
Si Davide nagpasalamat usab ngadto kang Garcia sa paghatag kaniya og sakyanan.
“Thank you for these new vehicles that you have given to us. Mas kusog pa raba ni modagan kaysa sa katong karaan”, ni Davide pa.
Ang maong mga sakyanan gamiton kini sa mga magbabalaod sa probinsya sa ilang trabaho ug pagsuroy sa kalungsoran ubos sa ilang distrito paghatag og serbisyo sa mga konstituwente niini. – BDB (BANATNEWS)