CEBU, Philippines — Naghinam-hinam ang Police Regional Office-7 sa paglingkod sa bag-ong PNP Chief nga si Police General Benjamin Acorda, Jr. hulip kang Police General Rodolfo Azurin, Jr. kinsa niretiro na sa katungdanan.
Ang turnover ceremony gipahigayon kini kagahapon sa buntag.
Matud ni Police Lieutenant Colonel Gerard Ace Pelare, tigpamaba ni Police Brigadier General Anthony Eberin, direktor sa PRO-7 nga ang kapolisan sa Central Visayas masaligon nga anaa sa maayong kamot ang PNP Organization ilabi na nga namapatud-an na usab ni Acorda ang iyahang katakos ingon man kasinatian sa field.
Si Pelare nagkanayon nga ang PRO-7 mopatuman sa kamandoan nga ihatag sa bag-ong nilingkod nga Chief PNP.
Nasayran nga si Acorda nadestino kaniadto isip direktor sa Directorate for Intelligence hinungdan nga gilaoman sa PRO-7 nga mas subsob ang ipahigayong intelligence driven operations batok sa tanang klase sa kriminilidad.
Gawas niini, si Acorda nahimo usab nga regional director sa Police Regional Office-10 hinungdan nga makita nga taas ang level of competence sa bag-ong Chief PNP kinsa gihulagway nga “humble” ug “God-fearing”.
Sa assumption speech ni Acorda nanawagan kini og kahiusahan sa Philippine National Police ilabi na karon nga ang organisasyon nag-atubang og pipila ka mga isyu.
Si Acorda miyembro kini sa Philippine Military Academy Class of 1991.
Gibutyag ni Pelare nga karong bag-o na ang Chief PNP mas mamahimong agresibo ang PRO-7 sa ilang kampaniya batok ilegal nga drugas. (BANAT NEWS)