CEBU, Philippines — Daghan ang alarma sa sunog nga natala sa Mandaue City panahon sa pagtimaan sa Fire Prevention Month sa Marso 2023 kon itandi sa samang buwan sa tuig 2022.
Kini ang gipadayag ni Fire Officer 2 Mark Louie Yap, sa Mandaue City Fire Office (MCFO) nga nahinabi sa mga tigbalita.
Dugang pa niya nga ilang natubag ang dili moubos sa lima ka insidente sa sunog niining maong bulan karong tuiga ug nagtala usab og danyos nga mokabat sa P192,000.
Gitataw ni Yap nga sa miaging tuig sa maong mga adlaw sa pagtimaan sa Fire Prevention Month ilang natala ang upat lamang ka sunog nga nagdala usab og danyos nga mokabat sa P185,000.
Lakip sa mga barangay sa siyudad sa Mandaue diin nahitabo ang sunog mao ang Barangay Subangdaku, Jagobiao, Tabok, Centro ug Banilad.
Ang mga biktima sa sunog sa maong mga dapit ang gihatagan na ni Mandaue City Mayor Jonas Cortes og pinansiyal nga ayuda.
Sa nasayran ang tag-iya og panimalay ang nakadawat og P10,000 ug P5,000.00 usab ang nadawat sa mga nag-abang nga mga biktima sa sunog. — MEL (FREEMAN)