Nanagiya’g mga estraktura sa baybayon sa Badian nagpaugat

CEBU, Philippines —  Dili mominos sa 21 ka mga tag-iya sa illegal structures sa kabaybayonan diha sa Lungsod sa Badian nga nakalapas sa 20-meters easement zone nagpaugat ug wala gihapon moguba sa mga estrakturang gipaboluntaryo og guba kanila.

Adunay 21 ka mga estraktura nga nakalapas sa 20-meters easement zone sumala pa ni  Manolito Recoplacion, officer-in-charge of the Municipal Environment and Natural Resources Office (MENRO).

Petsa 15 sa Pebrero ang gihatag nga deadline ni Cebu Governor Gwendolyn Garcia sa pagguba sa maong mga estraktura human ang kagamhanan sa probinsya nakadawat og daghang reklamo gikan sa mga mananagat.

Una niini, misaad ang maong tag-iya sa gobernadora nga motuman sa  easement zone ug boluntaryo nila kining gub-on sa dihang sila gipatawag sa tigom niadtong  Enero ning tuiga.

Nasabutan nga inay 20 meters nga easement zone, gihimo lang 15-metros samtang ang laing 5- metros magsilbi nga buffer zone  kay nihangyo ang mga tag-iya.

Kaning mga ilegal nga estraktura naisyuhan na sab og cease and desist order gikan sa municipal  government.

Si Recoplacion moduso og report nga isumitir ngadto sa provincial government ug magpaabot siya unsay aksyon nila kabahin niini.

Ang chairman sa Committee on Infrastructure sa lungsod , Konsehal Joseph Balbona, nibutyag nga moduso siya og resolusyon nga mag-awhag sa mga tag-iya  nga sundon ang  easement zones sa kabaybayonan.

Awhagon usab niini ang Office of the Building Official nga pahamtangan og silot kaning mga tagiya nga padayong nagmagahi ug dili motuman sa balaod. — IBM (BANATNEWS)