Hulagway gikan sa facebook sa Danao City Government Karaang minahan ug dili sinkhole ang nahugno

CEBU, Philippines — Giklaro sa City Government sa Dakbayan sa Danao nga ang insidente sa kamatayon sa usa ka 46-anyos nga ginang sa Barangay Sabang dili tungod sa sinkhole kondili karaang bangag kini sa minahan sa likod nga bahin sa Sabang Elementary School.

Ang nakalas sa maong insidente mao si Mejame Papaya kinsa natabunang buhi sud sa dul-an lima ka oras sa giladmon nga walo ka metros. Nahitabo kini samtang siya naglawog sa mga binuhing baboy.

Base sa taho sa CDRRMO ang tangkal sa baboyan ni Papaya nagtungtong gyud sa karaang minahan.

Ang CDRRMO nangayo og tabang sa 70SRR personnel apil ang volunteers gikan sa Special Assistance on Fire and Rescue Inc. (SAFARI) uban sa abag sa BFP.

Matud pa ni CDRRMO Chief Jikjik Reyes, dili sayon abton ang ground zero, kinahanglan pa maghimo og dalan aron makaagi ang backhoe.

Ang lawas sa biktima nakit-an alas nuybe y media diin dali nga gidala sa tambalanan pero gideklarar nga patay na.

Ang mga apektado nga residente gikan sa nahugno nga pit kay kasamtangan usa nanimuyo sa ilang mga paryente nga dili layo sa maong lugar, samtang wala usa paduoli ang nahagsa nga dapit.

Domingo sa buntag ang CDRRMO nihimo ug site inspection ug nibutang ug hazard prone areas. Ang Danao CSWDO nihatag na og hinabang sa banay sa namatay. Laing site inspection gikatakda sa CDRRMO uban sa City Engineering ug sa CENRO aron sa pagpangita sa uban pang posibleng mga tunnel sa ilawom sa Purok 3 sa maong barangay.

Wala pay gibutyag kun unsa nga kompanya ang nagmina sa lugar ug kun kinsay manubag sa maong insidente. — /IBM (BANAT NEWS)