Rama niduso og HB pagpausbaw sa suholan sa pribadong health workers

CEBU, Philippines — Gisang-at dayon sa kongresita sa Cebu City South District Eduardo “Edu” Rama, Jr.  atol sa subling pagbukas sa 19th Congress sa niaging adlaw ang iyang House Bill 4609 kun “Magna Carta of Private Health Workers” nga nagtinguha usab sa pagpa-usbaw  sa suholan sa pribadong health workers.

Ang Sugbuanong magbabalaod naghulagway sa COVID-19 isip usa ka walay kahadlok nga presensiya sulod sa niaging duha ka tuig ug dili unta makalahutay ang katawhan sa pandemiya kon wala ang paningkamot sa mga healthcare personnel.

“Health care institutions are only as good as the health workers comprising them. Health workers play an important role in setting the standard and quality of health care for the general population”, padayag ni Rama. Ang Magna Carta of Private Health Workers usa sa mga lakang nga ma-level ang playing field tali sa publiko ug pribado nga health workers ug sa samang higayon nagtumong sa paghatag sa mga benepisyo ug mga panalipod alang sa matag health worker sa mga pribadong mga.

Ubos sa HB 4609 ang suholan sa mga nurse dili moubos sa P35,000 alang sa entry-level samtang ang ubang health workers bayran og P850.00 kada adlaw.

Base sa datos sa salaryexpert.com ang usa ka entry-level private nurse sa Pilipinas makadawat og average nga sweldo nga P390,428 matag tuig o P32,535 matag buwan nga mao ang kinaubsan sa samang profession sa Southeast Asia.

Ug kong mapasar ang maong balaodnon ang mga pribadong healthcare worker adunay katungod usab sa usa ka buwan nga hazard pay nga labing menos P10,000 alang sa trabaho sa panahon sa pagpatuman sa usa ka community quarantine o kadtong trabaho nga nagtangag og peligro nga estado sa bisan unsa nga level. Uban sa HB 4606 ang tanang pribadong health worker makabaton usab og mga benepisyo nga gihatag ubos sa Akta Republika No. 7305 kun “Labor Code, Magna Carta of Public Health Workers” ug uban pang adunay kalabotan nga mga balaod, lagda, o regulasyon.  (/BDB)(BANAT NEWS)