Kampanya sa pagsulbad sa baha adunay dakong parte sa P50 bilyones

CEBU, Philippines — Gipaabot ang pagbirada og maayo sa kampaniya sa Kagamhanan sa Siyudad sa Sugbo sa Gubat sa Baha karong 2023  gumikan kay usa sa mga dakong parte sa P50 bilyones nga giduso sunod tuig gitagana sa programa nga adunay kalabotan sa maong kampaniya.

Base sa taho sa Cebu City Public Information Office gibutyag sa co-chairman sa  Gubat sa Baha Task Force Atty. Jerone Castillo nga sobra sa katunga sa 2023 proposed annual budget gitagana sa maong programa.

Tipik sa unod sa gi-propose nga budget mao ang  P24 bilyones alang sa pagpatukod sa gatosan ka medium-rise buildings (MRBs) nga puy-an sa informal settlers nga maapektohan sa pagpahawan sa mga nakalapas sa  three-meter easement zones sa kasapaan.

Samtang laingP1 bilyon itagana alang sa  lot acquisition aron makabaton og area diin tukoron ang buildings ug laing  P2.3 bilyones alang sa pag-abag sa kalihokan nga adunay kalambigitan sa  implementasyon sa Gubat sa Baha.

Si kanhi environment secretary Roy Cimatu kay una na nga nipadayag nga importante kaayo ang pagtinabangay alang sa maong kampaniya nga ubanan usab sa task force, opisyales sa dakbayan ug barangay ug sa katawhan. —/BDB (BANAT NEWS)