Luna nga gidonar para sa HPG-7 bawion sa kapitolyo
CEBU, Philippines — Gikatakdang pasakaan og kaso sa Kapitolyo ang Regional Highway Patrol Unit-7 aron papahawaon sa luna nga giokupar niini sa may Gorordo Avenue, Dakbayan sa Sugbo.
Ang hunta probinsiyal kagahapon nipasar og resolusyon nga gipangamahanan ni Bokal John Ismael Borgonia aron pagkanselar sa donasyon sa luna ug pagtugot kang Gob. Gwendolyn Garcia sa pagsang-at sa tukmang kaso batok sa RHPU-7.
Ang deed of donation gipirmahan tali nilang kanhi gobernador, karon Bise Gob. Hilario Davide III, RHPU-7 ug Criminal Investigation and Detection Group-7 niadtong Agosto 2018 may kalabotan sa luna nga iya sa Kapitolyo sulod sa Camp Sotero Cabahug, Gorordo Avenue.
Matud ni Borgonia nga ang mga sakop sa hunta probinsiyal nga nag-aprobar sa unang resolusyon nga gipangamhanan ni Bokal Celestino Martinez III wala masayud sa balor sa 1,358 metro kwadrado nga luna nga kapin sa P176.5 milyones sa tag P130,000 matag metro kwadrado.
Sila si Davide ug Martinez wala nitambong sa sesyon kagahapon.
Dugang ni Borgonia nga ang mga sakop sa hunta probinsiyal sa niaging administrasyon ni Davide wala masayud nga ang Kapitolyo nigahin na og luna sa Sudlon, Lahug, Dakbayan sa Sugbo isip Government Center alang sa tanang ahensiya sa gobyerno lakip sa kapolisan.
Nasuta sab nga ang donasyon walay pagtugot sa Commission on Audit.
Ang Kapitolyo makadaghan na nagpadala og suwat apan giingong wala gyud kini tagda sa RHPU-7 ug nasuta nalang nga gitukuran na hinoon ang luna og ilang istruktura. (BANATNEWS)
- Latest
