CEBU, Philippines — Gibutyag ni Konsehal Phillip Zafra nga aprubado na ang iyang sugyot nga maabot ang fluvial procession sa Fiesta Señor ngadto sa habig sa Barangay Suba, Pasil ug Sawang Calero lahos sa area sa NUSTAR Resort diha sa South Road Properties.
Nagpasabot kini nga moagi na ubos sa Cebu–Cordova Link Expressway (CCLEX) ang rota sa fluvial procession.
Nagkanayon si Zafra nga tumong niini nga malikayan ang mga dili rehistradong bangka nga mosugat sa galleon nga maoy kasagaran nga nahitabo kaniadto.
Gitambangan usab niya ang mga residente sa maong dapit nga dunay bangka nga kinahanglan nga magpa-rehistro sa coastguard ug MARINA-7 ug Philippine Coastguard kun gusto mosalmot sa fluvial procession.
Gani andam siya mosugyot nga moumol og satellite registration kun hasolan na kini sa naandan nga pamaagi sa rehistrasyon.
Mohimo usab sila og mga pulong-pulong ngadto sa nahisgotan nga mga barangay alang sa pagpahibalo bahin sa kausaban.
Bisan mas layo na ang rota, kinahanglang tapuson kining tanan sulod lang sa duha ka oras.
Kahinumdoman nga duha ka tuig nga walay fluvial processions tungod sa pandemiya. — Rowena Capistrano/IBM