Mga Badjao gikan Zamboanga nangabot tungod sa kapaskohan

CEBU, Philippines — Dul-an sa 70 ka mga libud-suroy ang nahipos sa Department of Social Welfare and Services(DSWS) sa Cebu City Government ug Cebu City Police Office atol sa gilusad nga ‘rescue operations’ nga gipahigayon kagahapon.

Matud ni Dr. Ester Concha, pangulo sa DSWS nga sa 70 nga na-rescue, 38 niini gikan sa Cebu City South District ug 31 sa North District ug sagad kanila mga Badjao.

Apil sa gi-rescue sa DSWS ug kapulisan ang mga ginikanan niining mga libud-suroy nga mga bata kay sila maoy gadala kanila aron mangayo og limos ug manaygon ug gipasagdan nga magdagan-dagan diha sa kadalanan.

Ang mga na-rescue gidala sa holding area diha sa South Road Properties (SRP), gi-edukar sila unsay ordinansa sa siyudad labot niining pagpangayo ug pagpakilimos sa kadalanan ingon man sa mga posibleng silot nga ipahamtang.

“Magpadayon gyud ni siya, sige naman mi actually pero usahay naa lang tay one time big time nga operations pero that’s every week pero naa gyud tay daily gyud nga operation kami-kami ra with the Anti-mendicancy kauban namo ang CESET usahay ang PROBE,” sigon ni Concha.

Si Concha miingon nga kaning mga tawhana dunay mga pinuy-anan dinhi sa siyudad, apan duna say mga gikan pa sa laing lugar sama sa Zamboanga nga motuyo gyud og anhi sa siyudad sa Sugbo ini og taliabot na ang Pasko aron magpakilimos.

Gawas sa Pasko, paabuton sab nila hangtud sa buwan sa Enero sunod tuig tungod kay nagsingabot ang Sinulog nga diin daghan kaayo ang mga turistang modugok sa selebrasyon.

Si Concha miingon nga kun magsige gihapon og balik-balik bisan nadakpan na, aduna na unyay silot nga ipahamtang batok sa mga ginikanan.

Sa pagkakaron, gusto sa siyudad nga ma-edukar kining mga ginikanan mahitungod niini. — /IBM (BANAT NEWS)