Dos mil ka kahoy gitanum sa siyudad diha sa kabukiran

CEBU, Philippines — Moabot ngadto sa 2, 000 ka mga nagkadaiyang matang sa kahoy ang gipangtanum sa kabukiran sa dakbayan sa Sugbo sa niaging adlaw.

Nisalmot sa maong tree planting activity mao si Mayor Michael Rama kauban ang pipila ka executives ug department heads sa City Hall.

Segun sa taho sa Cebu City Public Information Office, nahitabo usab atol sa maong kalihokan ang advance surprise birthday activity alang sa mayor nga gitambongan mismo sa asawa niya nga si Malou ug sa anak nila nga si MJ.

Gipahigayon ang kalihokan sa Cebu City Resource Management Center Office (Cremdec) sa Barangay Taptap.

Ang liboan ka mga kahoy nga gitanom sa bukid naglangkob sa Eucalyptus, Tagilumboy, Narra, Tugas, ug Pangantuon.

Gipaneguro sa kagamhanan ang pagpasiugda sa regular nga mga tree planting isip paghatag og proteksyon sa kalikopan.

Lakip sa kaayohan nga mahatag kun dunay mga kahoy mao nga makatabang kini sa pagpugong sa mga pagbaha.

Tumong usab sa tanang nisalmot niini nga makahatag sila og kontribusyon alang sa pagbaton og hamugaway nga lugar pinaagi sa mga kahoy nga ilang gitanom. (BANAT NEWS)