CEBU, Philippines — Pormal na nga gi-turnover ang ikatulong police precinct sa Dakbayan sa Talisay diin nahimutang kini diha sa Barangay Tanke.
Si Police Lieutenant Colonel Randy Caballes, hepe sa kapolisan sa siyudad nagkanayon nga magsilbi na kini nilang buhatan aron sa pag-monitor sa Barangay Tanke ug sa mga silingan niini nga barangay.
Si Mayor Gerald Anthony “Samsam” Gullas Jr. ang nigahin og pundo sa maong proyekto dihang siya pa ang kongresista hangtud nga nahuman kini ubos sa pagdumala sa iyang kapikas sa unang distrito.
Tinguha nila nga dili na mabalik pa ang dagway sa Tanke kaniadto nga daghan ang namaligyaay og ginadiling drugas. Ang kapolisan sa siyudad niumol sa Tanke defenders aron moabag kanila ug hingusgan kini.
Kaniadto, ang barangay hall sa Tanke maoy gipagamit sa kapolisan nga pundohanan atol sa ilang hugot nga kampaniya batok sa ilegal nga drugas.
Dugang ni Caballes nga dili nila mahingpit ang pagwagtang sa krimen apan mamenosan kini pinaagi sa ilang presensiya. — (/BDB) (BANAT NEWS)