CEBU, Philippines — Usa ka mananagat ang napalgang patay nga adunay samad pinusilan diha sa daplin sa dalan sa Barangay Dawis, lungsod sa Carmen niadtong Lunes sa kahaponon.
Si Police Staff Sergeant Jaycel Into sa Carmen Police Station miila sa biktima nga mao si Gerson Cabase Abarquez, taga Guinsay sa Siyudad sa Danao nga naila nga mananagat.
Kanunay kining makita sa lugar kay anha man kini magdahik sa ilang panagatan sa Barangay Dungoan nga utlanan usab nga bahin sa Lungsod sa Carmen ug Danao City.
Si Into miingon nga dunay kalibre 38 nga armas duol sa nagbuy-od nga patay’ng lawas sa biktima.
Nunot niini dili pa nila matataw kun nagpusil ba kini sa iyang kaugalingon o adunay laing tawo nga nipasipala niini.
Si Into miingon nga ilang gisugyot karon ngadto sa pamilya sa biktima nga ipaubos sa autopsy ang patay’ng lawas sa pagsuta kun nagpusil ba kini sa iyang kaugalingon o biktima kini sa laing tawo.— IBM (BANATNEWS)