CHAMP magbutang og satellite office sa mga tambalanan

CEBU, Philippines — Magbutang og satellite office ang Cebu City Hospitalization Assistance and Medicines Program (CHAMP) diha sa mga tambalanan nga accredited niini aron mas tulin ang pagproseso sa mga indibidwal nga mopaubos sa maong programa.

Nagkanayon si Jojo Lingaolingao, pangulo sa CHAMP nga nihangyo na siya sa mga accredited nga tambalanan  nga hatagan sila og lugar sulod sa tambalanan diin adto sila mopahimutang.

Base sa taho sa Cebu City Public Information Office target  ni Lingaolingao nga iniglingkod ni Mayor Michael Rama sa laing hugna sa iyang termino  karong Hulyo 1, 2022   magsugod na sila og deploy sa ilang mga personnel.

Aduna nay tulo ka tambalanan nga nisugot na sa ilang hangyo nga mao ang Ace Medical Center, Southwestern University Medical Center ug St. Vincent Hospital.

Naglaom ang CHAMP nga mosanong sa umaabot nga mga adlaw ang Perpetual Succour Hospital, Miller Hospital ug Cebu Doctors Hospital.

Gipahibalo sa CHAMP nga ipadayon na karong Agosto ang  pagbisita sa mga barangay  alang sa paghatag og impormasyon kabahin sa mga serbisyo nga gihatag sa ilang buhatan. Sa pagka-karon, adunay 100 pataas ang maatiman kasagaran sa CHAMP matag adlaw ug maka- disburse sila og P1.2 milyon ngadto sa P1.6 milyon sa usa lang ka adlaw. —BDB (BANATNEWS)