Zafra interesado sa komitiba sa peace and order

CEBU, Philippines — Gibutyag ni Cebu City Councilor Philip Zafra nga interesado gihapon siya nga ipadayon ang paghupot sa kasamtangan niya nga komitiba sa "peace and order" ug agrikultura sa konseho sa Siyudad sa Sugbo.

Hinuon gitataw sa konsehal nga mag-agad rapud siya sa mahimong hukom sa iyang mga kaubanan ilabi na sa bag-ong napili nga bise mayor nga si Raymond Garcia.

Nagkanayon si Zafra nga dili ra siya maglisod sanglit kadaghanan sa mga sakop sa konseho kauban rapud niya sa Partido BARUG.

Sa nasayran usa siya sa mga aktibo kaniadto nga nakigtimbayayong sa kapolisan alang sa pag-umol og mga security plan sa mga dagkong kalihokan. Nahimo usab siya nga aktibo sa pag-roving sa kabaranggayan isip sakop sa Cebu City COVID-Action Team (CCCAT)

Nihatag usab siya og partisipasyon alang sa pagpabilin sa kagamhanan sa pagsuporta niini sa150 ka mga miyembro sa Task Force Kasaligan.

Kun maghisgot usab og agrikultura, nangunay usab siya sa pagbisita sa kabukiran aron mahatod ang mga programa sa kagamhanan alang sa mag-uuma.

Gisuportahan kanunay ni Zafra ang mga programa nga gidumala sa Cebu City Agriculture Department. Usa siya sa nitabang aron makabaton ang Siyudad og dugang food terminal ingon man usab ang lapad nga "farm to market road".

Gipaneguro usab ni Zafra nga mabutangan og mga suga ang kadanan diha sa kabukiran. —MEL (BANATNEWS)