CEBU, Philippines — Gitugot na karon sa Dakbayan sa Sugbo ang pagpahigayon og Santos nga Misa sulod sa mga kapilya ilabi na kun kapistahan sa ilang mga patron.
Si Konsehal Joel Garganera, ang Deputy Chief Implementer sa Emergency Operation Center sa siyudad miingon nga nakigtagbo na sila sa mga kaparian sa Archdiocese of Cebu niadtong adlaw nga Biyernes aron sa pagsusi sa mga nagkadaiyang protocols sa mga ipahigayon nga relihiyosong kalihukan.
Sumala pang Garganera gitugtan na ang mga misa sa mga pista diha sa mga kapilya apan kinahanglang masunod sa tanan ang mga health protocols.
Gibutyag ni Garganera, aduna usab silay mga gihimo nga clarifications sa existing protocols ubos sa Alert Level 3 ingon man ang mga kalihukan unya atol sa Semana Santa.
Ang Semana Santa buksan kini karon Marso 2, 2022 pinaagi sa Miyerkules sa Badlis o Ash Wednesday.— IBM (BANATNEWS)