CEBU, Philippines — Ang Philippine Crop Insurance Corporation (PCIC) nanghatag og gatosan ka indemnity cheques nga nagsumatotal og P820, 216. 63 ngadto sa 19 ka mga barangay sa Dakbayan sa Toledo.
Gihimo kini pinaagi sa City Agricultural Services nga gipangulohan sa PCIC Underwriter Enrique Tampos ug kaabag si Toledo City Agriculturist Renelio Mabao. Sa report sa Toledo City Information Office, moabot ngadto sa 136 ka mga mag-uuma ang nakadawat og tseke alang sa pag-ugmad sa ilang makinarya ug pasilidad.
Ang mga mag-uuma nagikan sa mga barangay nga naglangkob sa Carmen, Tungkay, Canlumampao, Capt. Claudio, Sam-ang, Bato, Talavera,
Pangamihan, Matab-ang, Sangi, Sagay, Gen. Climaco, Bunga, Bulongan, Magdugo, Dumlog, Awihao, Poblacion, ug Cabitoonan.
Nasayran nga dili lalim ang sitwasyon sa mga mag-uuma ug mangingisda gumikan sa gisagobang nga pandemya. Si Mae Delia Tacandong, ang City
Administrator sa Siyudad sa Toledo nidasig sa mga mag-uuma nga gamiton gyud sa sakto ang nadawat nila nga assistance sanglit usa sila sa mga haligi sa ekonomiya.