CEBU, Philippines — Naghiusa sa pagpananom og mga kahoy sa miaging adlaw ang mga kawani sa Kagamhanan sa Siyudad sa Toledo, kapolisan sa maong dapit ug mga personnel sa Bureau of Fire Protection .
Gipahigayon ang maong tree planting activity didto sa Barangay Canlumampao sa maong siyudad.
Sa detalye nga gihatag sa Toledo City Public Information Office, giingong naumol ang maong programa isip tipik sa pagsaulog sa 121st Philippine Civil Service Anniversary.
Gidumala usab kini sa Toledo City Environmental and Natural Resources Office nga gipangulohan ni Amador Cavan.
Gipatigbabaw sa kagamhanan sa maong siyudad ang pagmintinar sa kaanindot sa kalikopan sa ilang dapit.
Tumong usab sa tanang nisalmot niini nga makahatag sila og kontribusyon alang sa pagbaton og hamugaway nga lugar pinaagi sa mga kahoy nga ilang gitanom.
Lakip sa kaayohan nga mahatag kun dunay mga kahoy mao nga makatabang kini sa pagpugong sa mga pagbaha. MEL (BANATNEWS)