Foul play subayon sa kamatayon ni Colita

CEBU, Philippines — Aron mapapas ang mga pagduda kabahin sa kamatayon ni Sgt. Celso Colita kun naghikog ba kini o tuyong gipatay diha sa kasilyas sa Regional Drug Enforcement Unit sa Police Regional Office -7 apilon sa imbestigahon ang mga polis nga kataposang nakauban sa namatay nianang adlaw sa pagkahitabo.

Kini maoy gibutyag ni Police Lt. Colonel Wilbert Parilla, Deputy City Director for Operations sa Cebu City Police Office nga nakahinabi sa The Freeman, igsuong pamantalaan sa Banat News.

Matud ni Parilla apil sa imbestigahon si Police Major Glen Hife, hepe sa RDEU nga maoy giingong kataposang nakaestorya ni Colita pipila ka minutos sa wala pa kini giingong naghikog.

Una nang gibutyag ni Hife nga iyang giinterbyu si Colita bahin sa kalambigitan niini illegal nga drugas samtang nakadestino pa ang namatay sa Sawang Calero Police Station.

Tulo ka oras sa wala pa namatay si Colita gi-ambush patay si Ritchie Nepomuceno diha sa N. Bacalso Avenue sa Barangay Basak-Pardo. Si Nepomuceno mao ang testigo ug reklamante ni Colita ug 12 ka mga kaubanan sa Sawang Calero Police Station tungod sa robbery-extortion, torture ug rape.

Matud ni Hife sa una niining pamahayag, dihang gipangutana niini si Colita kun may kalambigitan kini sa pagpatay kang Nepomuceno, wala kini motingog ug nananghid nga moadto sa kasilyas, apan taud-taod nagdungog ang buto sa armas gikan didto ug sa ilang pagsusi nagbuy-od na sa sawog ang maong polis. Hinuon si Parilla dili makatuo nga dunay foul play sa nahitabo kang Colita.

“Bisan siguro og bisan unsa kadako sa sala sa atong police, dili nato na mabuhat (foul play). Bisan og di na siya polis di gyud na siya mabuhat sa polis,” sigun pang Parilla kinsa nagtuong maklaro lang kining tanan ini og human sa imbestigasyon.  “Ang tanan posible imbestigahan sa atong mga imbestigador. Whether naay foul play, the only one who can confirm that is the investigating unit who is in charge of the case,” matud ni Parilla.

Hangtud ning pagbalita, wala pa migawas ang resulta sa ballistics examination sa narekober nga armas sud sa kasilyas nga gituohang gigamit ni Colita sa paghikog niini kun mao ba sab ang gigamit pagpatay kang Nepomuceno.

Wala pa sab mahibaw-i kun diin gikan ang maong armas sanglit gidisarmahan man si Colita ug mga kaubanan samtang sila gipaubos sa camp restriction order.

Si Police Brigadier General Ronnie Montejo, hepe sa PRO-7 mipahibalo nga nagpatabang sila Criminal Investigation and Detection Group (CIDG) aron pagsusi sa kriminal nga aspeto sa imbestigasyon sa pagkamatay ni Colita.— IBM (BANATNEWS)