Duha ka bodega naugdaw

CEBU, Philippines — Duha ka mga insidente sa sunog ang natala sa Dakbayan sa Sugbo ug sa Dakbayan sa Talisay sud lang sa 24 oras nga niresulta sa P2 milyones kapin nga danyos sa kabtangan sa mga biktima. Ang unang sunog nahitabo diha sa usa ka bodega sa panapton diha sa  5th Street, Happy Valley, Barangay Guadalupe ning Dakbayan sa Sugbo alas -7:02 sa gabii adlaw nga Domingo. Ang pabrika giingong gipanag-iya sa usa ka Eddie Chua. Gibana-bana moabot ngadto sa P2,040,000.00 ang danyos sa maong sunog, wala hinuoy natala nga naangol o nakalas samtang padayon pa ang kabomberohan sa ilang imbestigasyon bahin sa hitabo.

Samtang P72 mil usab ang danyos sa sunog nga niulbo sa stockroom sa St. Thomas Aquinas, sa  Barangay Lawaan 1 sa Dakbayan sa Talisay kagahapon sa buntag. Ang sunog giisa lang sa 1st alarm ug hingpit nga na fire out alas 10:05 sa buntag. —IBM (BANATNEWS)

Show comments