Kapin sa 1,000 ka tikasan nga timbangan nasakmit
CEBU, Philippines — Ang Cebu City Market Operations Division (MOD) nipalapad sa ilang kampaniya sa pagsakmit sa mga tikasan nga timbangan o wala na-calibrate nga mga timbangan diha sa kamerkadohan.
Matud ni Irvin Caballes, hepe sa MOD nga sukad sa pagsugod sa tuig 2021 kapin na sa 1,000 ka timbangan ang ilang nakompiska.
Ang maong mga timbangan wala marehistro, kulang sa timbang ug sobra sa timbang ug gikatakda kining panggub-on.
Ang kanunay nga pag-inspeksiyon sa kamerkadohan naumol aron mahunong na ang reklamo sa pipila ka konsumidor nga giingong natikasan sila sa pipila ka mga tindera.
Ang nanag-iya og timbangan nga wala marehistro makabayad og P500 nga multa samtang ang tikasan nga timbangan kompiskahon kini.
Gawas sa pag-monitor sa mga timbangan ang MOD nipatuman usab sa health ug safety protocols diha sa kamerkadohan.
Giawhag sa MOD ang publiko nga motuman kanunay sa mga lagda aron malikay sa COVID-19 sama sa kanunay nga pagsul-ob og face mask.
Gipahimangnoan na usab ang mga manindahay nga ipatuman usab kanunay ang social distancing ilabi na sa panahon nga modagsa ang ilang mga kustomer. —BDB (BANATNEWS)
- Latest
