Cebu, Philippines — Gikalipay sa mga kawani sa city hall sa Dakbayan sa Lapu-Lapu ang pahibawo ni Mayor Junard Ahong Chan niadtong Biyernes nga makadawat og Christmas bonus ang mga casual ug regular nga mga kawani sa kantidad nga usa ka bulan nilang suweldo.
Sukwahi kini sa unang pahibawo sa mayor nga dili mohatag og Christmas bonus ning tuiga gumikan sa mga panginahanglan sa gisagobang nga coronavirus disease.
Hinuon gitataw ni Chan nga kinahanglan pa nga kaaprobahan ang ipalabang nga supplemental budget sa special session uban ang paggahin og P34 milyones nga maoy kuhaan sa Christmas bonus sa mga kawani.
Madawat usab sa mga kawani sa city hall ang P5,000 nga performance enhancement incentives, bugas, ham ug ang mga job order sa city hall makadawat usab sa kantidad nga otso porsiyento sa usa ka bulan nilang suweldo gikan sa Enero 2020 hangtod sa Oktobre 2020.
Samtang gipadayag sa Cebu City Legal Office (CLO) nga wala’y legal impediment ang resolusyon alang sa paghatag og P10, 000 cash incentives sa matag kawani sa kagamhanan sa syudad ubos sa Program on Awards and Incentives for Service Excellence (PRAISE).
Una niini giaprobahan sa konseho sa siyudad ang resolusyon nga maghatag ug cash incentives sa mga empleyado sa city hall ug giduso kini ngadto sa city legal office alang sa legal opinion.
Ang P10, 000 ihatag sa mga aktibo nga empleyado sa gobyerno sa syudad hangtod Nobyembre 30, 2020 nga naka-serbisyo na og upat ka buwan.
Alang sa mga nagserbisyo sa tulo ka bulan apan wala pa sa upat ka bulan, makadawat sila usa ka pro-rated cash incentive nga 60 porsyento sa P10,000; 40 porsyento sa duha ka bulan apan ubos sa tulo ka bulan, ug 20 porsyento sa mga ubos sa duha ka bulan. ( BANAT NEWS)