CEBU, Philippines — Nakaalerto karon ang Cebu City Disaster Risk Reduction Management Office gumikan sa nagsagunson nga mga pag-ulan ug nagmugna og kadaut sa pipila ka mga dapit sa siyudad.
Suma pa sa officer-in-charge sa CCDRMO nga si Ramil Ayuman nga hingpit ang ilang pagmonitor karon ilabi na sa mga lugar nga dunay na-report kaniadto nga mga pagdahili sa yuta.
Dunay pagdahili sa yuta nga niigo kahahapon sa Sitio Maling sa Barangay Babag 2. Suma pa nga duha ang gikatahong naangol sa maong insidente.
Ang usa niini kay nagmaneho og motorsiklo, samtang bata ang usa nga nabanlas apan maayo nalang na luwas na ang kahimtang karon.
Duna puy laing pagdahili sa yuta nga nahitabo sa Sitio Kabarang , Barangay Sapangdaku apan walay gikatahong naigo niini.
Sa pikas bahin, grabeng pagbaha usab ang nasinati sa taga Sitio Common, Brgy. Bacayan nga resulta gihapon sa kusog nga ulan.
Gitambagan ni Ayuman ang nga nagpuyo sa bakilid ug kadtong nagpuyo dapit sa sapa nga magbinantayon kanunay ug mobakwit dayon kun pananglitan maapeke na sila sa sitwasyon.
Gawas sa CCRDMO , nakaalerto usab Department of Social Welfare and Services (DSWS) kinsa maoy mo-asses sa mga panginhanglanon alang sa mga pamilya nga maapektohan sa kalamidad. /IBM (BANATNEWS)