CEBU, Philippines — Patay ang usa 62-anyos nga mananagat ug naangol ang anak niini human sila naigo sa kilat samtang nanagat diha sa Sitio Panagikan, Barangay Tapon, sa Lungsod sa Dalaguete niadtong Miyerkules sa kaadlawon.
Ang nakalas mao si Eleuterio Delposo, samtang angol ang iyang anak nga si Jonathan, ug parehong nagpuyo sa Barangay Mananggal sa maong lungsod.
Matud pa ni Police Chief Master Sergeant Maria Fay Isidro, Desk Officer sa Dalaguete Police Station, nanagat ang manag-amahan sayo sa kaadlawon bisan og dautan ang panahon.
Sumala pa ni Isidro, adunay pag-ulan-ulan ug nagpangilat- kilat ang kalangitan sa lungsod nianang mga orasa.
Ang ubang mga mananagat mao nay nitabang sa manag-amahan ug gidala sila sa Rural Health Center sa lungsod apan gideklarar ang amahan nga nabugtoan sa iyang kinabuhi.
Ang anak nga si Jonathan gidala sa tambalanan tungod sa naangkong mga paso sa kalawasan tungod sa pag-igo sa kilat.
Ang kapolisan subling mipahinumdom sa mga mananagat ug sa publiko nga likayan una ang pagadto sa dagat kun dautan ang panahon. —/IBM (BANAT NEWS)