CEBU, Philippines — Nakigtagbo ang Cebu City Police Office (CCPO) sa mga mall security managers sa Dakbayan sa Sugbo alang sa pagpatuman sa seguridad ug health protocol sa pagbukas pagbalik sa patigayon.
Matud ni CCPO Director Josefino Ligan nga gawas sa mga barangay auxiliaries gipasabot sab sa kapolisan ang mga mall security managers nga usa sa ilang responsibilidad ang pagseguro nga nagsunod ang mga mall goers sa health protocol nga ipatuman. Dugang pa ni Ligan nga magsilbi usab nga contact tracer ang mga mall security personnel kun diin ipaseguro nga nakalagda og sakto ang mga impormasyon nga ipangbutang sa dili pa mosulod sa mall. Gawas niini nasabotan sa kapolisan ug mall security personnel nga ipaubos usab sila og contact tracing training seminar aron matudloan sa pagpatuman sa basic nga lakang sa contact tracing. Tinguha ni Ligan nga mokabat ngadto sa 500 ka tawo ang mapaubos og contact tracing seminar sa Dakbayan sa Sugbo aron motabang sa pagpatuman sa contact tracing sa mga posible nga carrier sa virus nga makatakod. /GMR (BANATNEWS)