CEBU, Philippines — Usa ka polis ug mga kauban niini ang gidakop mga sakop Integrity Monitoring and Enforcement Group (IMEG) Visayas Field Unit sa Barangay Lahug Dakbayan sa Sugbo tungod sa pagpasiugda og tigbakay.
Giila ang maong polis nga si Police Staff Sergeant Charlito Tinoy nga kanhi nadestino sa Regional Mobile Force Battalion (RMFB)-7.
Matud ni Police Captain Sigmund Freud Cruz sa IMEG-VFU nga nakadawat sila og reklamo gikan sa mga residente sa maong dapit kalabot sa pagpasiugda sa maong polis og tigbakay sa ilang lugar. Dugang pa ni Cruz nga nakuhaan og video ug naaktuhan si Tinoy sa pagpatari niini uban nilang Jojo Ombos Mainit, 35; Frederick Jacalan Vosotros, 41, ug Lando Sabanal Calumba, 49.
Nasayran sab gikan ni Cruz nga ag-o rang nakapiyansa niadtong Marso 10 si Tinoy sa laing kasong gipasaka kaniya sa IMEG-7 human kini nadakpan nila niadtong Marso 10 sa mao gihapong barangay tungod pagpataya niini og illegal swertres sa ilang dapit. Sa pagkasikop kaniya niadtong buwana, girelibohan kini gikan sa RMFB-7 ug gi-assign na karon sa Regional Personnel Holding and Accounting Unit (RPHAU7) samtang nagpadayon ang kasong adminstratiba.
Kaso batok sa ilegal nga sugal ug paglapas sa Quarantine Act ang ipasaka batok sa mga dinakpan. /IBM (BANATNEWS)