CEBU, Philippines — Duha ka lalaki kinsa nagpailang mga volunteer ug nisuway sa paglabang sa border diha sa Sitio Laray, Barangay San Roque, Dakbayan sa Talisay ang gidakop kagahapon sa buntag.
Ang mga dinakpan nailhan nga sila si James Kenneth Godiala Villarta, 26-anyos, ulitawo ug si Cristan Rey Embate Pansacala, 29-anyos, mga residente sa Barangay South Poblacion, Siyudad sa Naga.
Gikatahong si Villarta ug Pansacala nisuway sa paglabang diha sa nahisgutang border ug nipakita og ID nga mga volunteer sila sa purok sa Dakbayan sa Naga.
Si Villarta ug Pansacala gibabagan kini sa mga nagbantay sa border tungod kay ang ilang ID nga gipakita wala malakip sa exempted ug pareho usab sila nga walay mga quarantine pass.
Giingong ang duha nipugos gyud nga molabang ug wala nitahod sa mga otoridad nga gidestino sa border checkpoint hinungdan nga gipangdakop kini.
Si Villarta ug Pansacala girekisa kini sa mga polis ug nasakmitan og 16 ka gagmay nga paketeng shabu.
Ang mga suspetsado natingkagol karon diha sa detention cell sa Talisay City Police Station diin gikatakda kining pasakaan og tukmang kaso sa nahimo nilang kalapasan. /BDB (BANATNEWS)