CEBU, Philippines — Duha ka tawo nga nalista unta nga makadawat sa Special Amelioration Program (SAP) ang gidayeg human sila nibalibad sa maong hinabang nga programa sa Department of Social Welfare and Development (DSWD).
Ang Barangay Dumlog, Dakbayan sa Talisay nanghatag na og hinabang ubos sa SAP sa niaging adlaw.
Una niini, si Elgie Mella, taga Sitio Pagatpatan, Barangay Dumlog naapil sa lista sa beneficiaries sa SAP bisan pa man og nakadawat na siya sa Unconditional Cash Transfer (UCT) niadtong niaging buwan.
Sa pagkakita niya sa iyang pangalan nipahibawo dayon siya sa mga hingtungdan nga ikanselar ang iyang pangalan aron mahatag kini sa uban nga wala pa mahatagi og hinabang.
Laing matinud-anon mao si Marvin Canillo, usa ka construction worker nga taga Zone 3, Barangay Dumlog. Matud ni Canillo nga duha unta ang ilang madawat sa SAP tungod kay naapil sa listahan ang iyang pangalan ug sa iyang inahan.
Apan nag-ipon sila sa pagpuyo sa iyang inahan hinungdan nga usa lang gyud ang pweding makadawat kanila.
Si Marissa Bering, usa sa mga nanghatag sa SAP sa Barangay Dumlog nagkanayon nga dili kalikayan nga masipyat ug mapasalamaton sila tungod kay adunay mga matinud-anon nga taga Barangay Dumlog.
Ang maong pagkamatinud-anon sa duha ka molupyo ang gidayeg sa kadaghanan ilabi na diha sa social media. /BDB (BANATNEWS)